1. Lspachuau (talk · contribs) - Lalsangliana Pachuau, Aizawl, Mizoram, India

HYPOCORISM leh kan SAKHMING Hypocorism tih chuan, in kohduatna (pet name) emaw hming pum nilemlo, a tawi deuh zawnga in kohna (dimunitive) a ni mai a. Mahse, kan hming nena inmil lo lutuka inkoh hi a awm ve bawk. Mizote ah hian tiang ang hi tam tak kan awm entirnan:- Lalsangliana Pachuau ka ni a, Sanga minti an awma, mahse a tamzawk chuan ka hming inkara a bul tanna zel (initial) hmangin LS (abbreviation of LalSang) tiin min ko a, heichu a hriatthiam theih a. Mahse, Sang tih tel lampang hi ‘Sangtawi’ ti a ko tlat kan awm bawk. A dang pawh sawi tur a tam ang. Tin, lemchangmi, milem ziakmi te leh abikin lehkhabu ziakmi ho zingah hian midang hming nena hriatpawlh loh nan te leh an thilziak chanchin avanga nunna derthawn hlauh avanga hming thlak leh hming dang hmang (pen name/alias/pseudonym) an awm nual bawk a. Samuel Langhorne Clemens an Mark Twain tih hming a hmanga, K.C. Lalvunga’n Zikpuii Pa a inti daih a, Zoliana pawh Val Zotea, Charles Dodgson an Lewis Carroll, Stephen King an Richard Bachman tih a hmang zeuh zeuh bawk a. Heng mite lo pawh hi, hming dang hmang an awm teuh mai, Guns’n’Roses a Axl Rose te pawh, William Bill Bailey niin, Slash pawh Saul Hudson a ni daih thunga, midang tam tak pawh chutiang bawkin. Mahse, kan hnamhming(surname) Ralte, Sailo, Kawlni tihvel hi chu kan thlak ngailo ang bawkin hnamdang, abikin Sapho(English) pawhin an thlak bik lemlo. Entirnan Archie Comics a characters, Moose Mason (Mason-lung lama eizawng, lung mistiri), Betty Cooper (Cooper-Tuizem khawr, siam) te pawh an awmin, Novel ziaktu, Jeffrey Archer (Archer-thal kap mi) etc etc. Betty tihbik te hi, Hebrew, Elisabeth (meaning “God is my oath”) tih a ‘Beth’ tih kohduatna a ni a. Elizabeth tih leh Beatrice tih te lamtawi/kohduat nana hman a ni bawk.

Keini Mizote hian heng inkohduatna te hi hming pangngai a hman kan ching angreng hle mai a. A sap hming, Christian hming kan inphuah sawiselna lam nilovin. Enge hming inphuah te hian eng awmzia nge an neih tih hrelo a pu hlen leh phuah sak ta hi kan tam ta ve ang. BILLY or BILL tih hi in enchhin teh ang. Billy The Kid kan hrelar hle in a rinawm a. Ani pawh hi a pianpui hming chu William Henry McCarty, Jr. niin Henry Antrim ti a koh a ni bawk a. Tichuan, William H. Bonney inti lehin a larna hming leh kan hriat lar ber zawk chu Billy the Kid tih a ni ta a ni. Heta, William tih Bill ti a koh a nih tak daih nachhan hi sawi ka tum deuh ber zawk chu a nia. Tin, hming dang Robert te pawh Bob, Bobby ti a koh a ni bawk a, John te pawh Jack, Richard pawh Dick, Sally pawh Sarah, Dolly pawh Dorothy, Edward pawh Teddy. A dang pawh a tam mai a.

Awle, Bill tih bik hi in chhui chin teh ang. Tawng leh hawrawp (alphabet) kan lam rik dan hi a hnam a zirin a in ang vek lemlo a, entirnan, W hi V anga lam tlat, V hi W or B anga lam tlat Indian ah leh hnamdangah pawh an tam em em a. Chutiang chiah chuan Russian hawrawp ah hian B hi a rik danah W nen a in ang em avangin Will-iam, Will chu Bill ti in an lam a. Chumai bakah, William tih hming hi Europe, Russia ram chhehvel a hming lar tak a nih avangin William tih chu Bill tia koh a ni hlen ta a ngaih a ni. William tih hrim hrim hi French hming ‘Guillumme’ tih English a leh (Anglicized) a ni a. Tin, 13th – 14th Century hunlai khan hawrawp thlakthleng hi (letter swapping) hi an uar em em a, hming pakhata hawrawp thlakthleng pawh chin thanah neiin a then tamtak chu tunlaiah hman ni tawhlo mahse tamtak chu tun thlengin kanla hmang chhunzawm zel a ni.

Mizote hian kan Mizo rawngkai nilemlo hming kan inphuah hian ‘Saphming’ kan ti leh ringawt thin a. Heihi chu a felhlel deuhin ka hria. Entirnan, Alex tih hmingpu kan awm nual a. Heihi, a tobul chu Greek hming Alexander tih lamtawi (Alex) a ni daih a, Saphming a ni lemlo a ni tih hriattur. Tin, sap kan tih, English-ho ngei ngei pawhin anmahni atanga chhuak ni lemlo hming an in phuah ve tho tih hriat a tha. Saphming (ti tawh mai teh ang) hi ka nei lemlo a, mahse ka farnute pahnih erawh chuan an nei thung a, Connie (Constance tih atanga lak) leh Sarah Pachuau an ni a. Intih Mizo tum lutuk avanga Mizo hming hlang nilo pu te ngaihsanloh ringawt kan ching hi chu, Thangkura’n a tih dan takah, a sapram kal loh thlak em mai.

Tin, kan tawng hi hnam dang tan lam a harsa deuhin, hriat pawh a harsa deuh bawk a, chuvangin, kan ram chhung(Mizoram) ringawt nilo, rampawna khawsak leh eizawn tum leh khawsa mekte tan chuan hming dang (saphming) neih hi ‘advantage’ pakhat a ni ve thei a ni. A chhan chu, ka hming hi hnamdang ho hian an lam dik mawhin an ziahna ah pawh a dik khat khawp mai. Sanga tih kha Sang-gha ti a min ko an awma. Vawikhat ka sobriety birthday, NA (Narcotics Anonymous) group pakhatin min lawmsak tumin, birthday cake ah chuan ‘Happy Birthday Sangha(fish)’ tih anlo ziak kulh maia. David, Alex or Samuel tihvel chu ni ilang chuan an tisual hauhlo ang. Pachuau ka intih leh Pachau minti leh bawk si a. Mahse, ka hming ka zahpui tihna lam nilovin, hmingdang(saphming ) pu te hi an vannei zawmah ka tihna zawk a ni. Awle, Mizo kan ni a, mahse kan Mizo hming piah lama hmingdang(saphming) kan in phuah/phuahsak dawn a nih chuan a awmzia hriatchian a tha hle in ka hria. Tunlaiah, Google atangin a zawnchhuah vek theih tawh a. Kan hming min sak saktu ten an phuah ang anga pu mawl ve tawp lovin enge a awmzia tih hi hriat a tha ka ti khawp mai.