Container

Mit en Container [IPA: ˌkɔnˈteːnɐ, ˌkɔnˈtɛɪnɐ] (Vun Latiensch continere „tosamenhollen“, „faten“) is meist en groten Kassen mit meent, wo allerhand Saken in lagert un transporteert weert. Containers sund ganz verscheden groot. To’n Deel sünd se normt.

De wichtigste un meist bekannte Containertyp is de 40-Foot-Container för den Hannel över de ganze Welt hen, sunnerlich in de Seefohrt. Vun düsse Aart vun Containers na ISO 668 (freight container) sund upstunns mehr as 15 Millionen Stück in’n Verkehr.

De Fracht- oder Schippscontainer is 1956 vun den Reeder Malcolm McLean an de US- Oostküst to’n eersten Mol insett wurrn. An’n Anfang hefft se dor minnachtig up keken, man gegen den Wedderstand vun de Schauerlüde un Habenarbeiders hett he sik slank dörsetten konnt.

Midderwielen weert mit Containerscheepe (dormank veel Feederscheepe) over de Containerhabens twee Drüddel vun den internatschonalen Warenverkehr ümsett’. Dor sund de Frachtcontainers de Grundlaag vun de Globaliseerung in de Weertschop mit wurrn. U.a. warrt de gröttste Deel vun den Hannel mit Feerdigprodukte mit Containers bedreven. Vunwegen ehre normten Maate könnt Containers mit ganz verschedene Transportmiddels, as Seescheepe, Binnenscheepe, Iesenbahn un LKW hen un her bröcht un slank umslahn weern. Begäng sund dor de 20-Foot-Containers, de so nömmten TEU (Twenty-foot Equivalent Unit) un de 40-Foot-Containers (FEU = forty foot equivalent unit).

De 20-Foot-Standardcontainers sund (buten) 6,058 x 2,238 x 2,591 Meters groot. Se könnt t.B. 10.000 Jeans oder 20.000 Klocken, original inpackt, upnehmen. För Ware, de kull blieven mutt, gifft dat ok Küll-Containers. Dat gröttste Containerschipp vun de Emma-Mærsk-Klass is in Däänmark inschreven un kann meist 13.000 vun düsse Standardkassens upnehmen. De gröttste Containerhaben is, siet en poor Johren in Hamborg dat Containerterminal Olenwerder. Vun de Standard-Seecontainers sund up de ganze Welt um un bi 28 Millionen Stück in’n Insatz. Normolerwiese könnt se in’n Döörsnitt 12-13 Johre lang bruukt weern. In leste Tied sund de Containers tomeist in China boot wurrn, tolest sund dat meist 3 Mio. Stück TEU in’t Johr ween. Vunwegen de Finanzkrise is de Produktschoon duchtig afsackt.

Een kann de Standard-Containers (ok Dry-Containers nömmt) fudder in veer Containertypen updelen:

Dry Container

Reefer Container

Open Top Container

Flat Rack Container

^{[1] [2]}

Dat gifft noch en ganzen Barg annere Containers, de to’n Deel in internatschonale Normen beschreven sund. Vunwegen de Norm is dat eenfacher, de Kassens in den Intermodalen Verkehr in to setten. Dat bedutt, dat Fohrtüüch, dat den Container driggt, warrt to’n minnsten eenmol wesselt.

• Afrullcontainer-Transportsysteme weert sunnerlich as Affall-Container oder för’n Sperrmüll faken bruukt. Spezielle Containers vun düt System weert hen un wenn bi de Füerwehr insett’, wenn dor Anlagen un Warktüüch mit hen un herbrocht weern mutt.
• Binnencontainers för den Insatz bi de Binnenschipperee
• CC-Containers
• Holtcontainers, as se bruukt weert för Planteneer, wo grote Planten in wuddeln doot.
• Intermediate Bulk Containers (IBC), t.B. för allens, wat fleten deit
• Kullcontainers
• Dröögcontainers
• Lagercontainers ut Stahl. Dor warrt ganz verscheden Material in lagert
• Affallcontainers – kiek bi Affallemmers
• Luftfrachtcontainers. De sund up de eene Siet schreeg, datt se beter in’n Fleger passt

Containers speelt ok as en Bo-Element bi dat Boen vun “Containerhüser” en Rull. Se könnt för ganz verscheden Upgaven insett weern, to’n Bispeel as “Wahncontainer”, “Kontor-Container”, “Toiletten-Container” oder “School-Container”. Dor weert se normolerwiese enkelt för upstellt un kriegt Finsters un Dören un weert binnen mit dat Nödige utstafeert. So könnt sik dor Minschen in upholen.

• Marc Levinson: The Box - How the Shipping Container made the world smaller and the economy bigger. 9th edition, Princeton University Press, Princeton, 2008, ISBN 978-0-691-13640-0.
• Olaf Preuß: Eine Kiste erobert die Welt. Murmann Verlag, Hamborg 2010, ISBN 978-3-86774-113-2.

Container. Mehr Biller, Videos oder Audiodateien to’t Thema gifft dat bi Wikimedia Commons.

1. ↑ Containertypen Containertypen
2. ↑ Containermaße Containermaate